សៀមរាប៖ ស្របពេលអាកាសយានដ្ឋានអន្តរជាតិសៀមរាប-អង្គរ នឹងដាក់ឱ្យដំណើរការជាផ្លូវការនៅខែតុលា ឆ្នាំ២០២៣ ខាងមុខនេះ រដ្ឋបាលខេត្តសៀមរាបកំពុងតែពិភាក្សាលើគម្រោងស្ថាបនាផ្លូវរថភ្លើងធុនស្រាលពីអាកាសយានដ្ឋានឆ្ពោះមកក្រុងសៀមរាប។
គម្រោងស្ថាបនាផ្លូវរថភ្លើងធុនស្រាលនេះត្រូវបានធ្វើឡើងក្នុងកិច្ចពិភាក្សារវាងអភិបាលរងនៃគណៈអភិបាលខេត្តសៀមរាប លោក ពិន ប្រាកដ ជាមួយក្រុមហ៊ុនចិន China Metro និងលោក ស៊ី សាវមីង វិស្វករជាន់ខ្ពស់ផ្នែកចលនាកម្មដងផ្លូវនាថ្ងៃទី២៣ ខែសីហា ឆ្នាំ២០២៣។
វិស្វករជាន់ខ្ពស់ផ្នែកចលនាកម្មដងផ្លូវ លោក ស៊ី សាវមីង បានបញ្ជាក់ថា គម្រោងស្ថាបនាផ្លូវរថភ្លើងធុនស្រាលនេះមានជម្រើសចំនួន២ គឺជម្រើសសាងសង់នៅលើផ្លូវចាស់ និងជម្រើសមួយទៀតសាងសង់នៅផ្លូវថ្មី។
លោកបានថ្លែងថា៖ «ម៉្យាងទៀតគម្រោងនេះ នៅពុំទាន់ច្បាស់លាស់នៅឡើយ ដោយក្រុមការងារបច្ចេកទេសបានកំពុងចុះមកធ្វើការសិក្សា ដើមី្បប្រមូលនូវទិន្នន័យ នូវរាល់ផលប៉ះពាល់»។
បើតាមលោក ស៊ី សាវមីង ខាងក្រុមហ៊ុនចិន បានសំណូមពរឱ្យអាជ្ញាធរគ្រប់ជាន់ថ្នាក់ និងស្ថាប័នពាក់ព័ន្ធចូលរួមសហការក្នុងការប្រមូលព័ត៌មាន និងទិន្នន័យដោយថាផ្លូវរថភ្លើងនេះអាចនឹងឆ្លងកាត់តំបន់អង្គរ និងអាចមានផលប៉ះពាល់តំបន់បូរាណដ្ឋាន ឬ តំបន់ដែលអាជ្ញាធរជាតិអប្សរាបានហាមឃាត់។
ឆ្លើយតបនឹងគម្រោងនេះ លោកអភិបាលរងនៃគណៈអភិបាលខេត្តសៀមរាប លោក ពិន ប្រាកដ បានយល់ស្របនឹងគម្រោងនេះ ហើយនឹងត្រៀមសហការជាមួយក្រុមហ៊ុនសិក្សាអំពីផលប៉ះពាល់។ លោកថ្លែងបន្តថា តាមរយៈគម្រោងនេះនឹងអាចឆ្លើយតបទៅនឹងការកើនឡើងនូវភ្ញៀវទេសចរ និងសេវាកម្មដឹកជញ្ជូននាពេលអាកាសយានដ្ឋាននៅខេត្តសៀមរាបចាប់ផ្តើមបើកដំណើរការឆាប់ៗខាងមុខនេះ៕